පුරහද කළුවරින් ආ වන්නිහාමි

ඊයේ දවල් TV දෙරණින් දැයෙන් සමුගත් ප්‍රවීණ රංගධරයෙක් වෙන ජෝ අබේවික්‍රමයන්ට උපහාර පිණිස එතුමන්ගේ විශිෂ්ඨතම රංග ප්‍රතිභාව පිළිබිඹු කරන “පුරහඳ කළුවර" චිත්‍රපටිය පෙන්නුවා.

මම ජෝ අබේවික්‍රම හඳුනාගන්නේ පුරහඳ කළුවර චිත්‍රපටියෙන්. මේ චිත්‍රපටිය පස්සේ කාලේ TV එකේ පෙන්නද්දී මටත් බලන්න පුලුවන් වුණා. එතුමන්ගේ විශිෂ්ඨතම රංග ප්‍රතිභාව පෙන්වන්නේ ඒ චිත්‍රපටියෙන් කියලා මම කියන්නේ එක්තරා විදිහටකට නිරපේක්ෂව. මොකද මම එතුමන්ගේ බලලා තියෙන එකම චිත්‍රපටිය වෙන්නේ පුරහඳ කළුවර නිසා.

ජෝ අබේවික්‍රමයන් පුරහඳ කළුවර චිත්‍රපටියේ වන්නිහාමි චරිතයට පණ පෙව්වේ නුවර කලාවියේ ගම්මානෙක ඉන්න සෑබෑම වන්නිහාමි විදිහටමයි. එතුමන් නොහිටියා නම් ඒ චරිතය කරන්න වෙනත් සුදුසු නළුවෙක් සොයාගන්න ප්‍රසන්න විතානගේට හැකිවෙයිද කියන එක මට සැකයක්.

චිත්‍රපටිය පුරාම ගැඹුරින් විහිදෙන පිය සෙනෙහස දැක්කාම මට නම් මතක් වෙන්නේ සිංහබාහු වේදිකා නාට්‍යයේ සිංහයා තුළ තමන්ගේ දරුවන් ගැන පවතින ස්නේහය.

පුතු සෙනේ මස් නහර හම සිඳ
ඇට සොයා ගොස් ඇට තුළට වැද
ඇට මිදුලු මත රඳා සිට දුක්
දෙයි නිබන්දා

නාට්‍යධර්මී නාට්‍යයක පැවතුණ මේ ඇටමිදුළු දක්වා කිඳා බසින පිය සෙනෙහස අතිශය සාර්ථකව රිදී තිරයට ගේන්න ප්‍රසන්න විතානගේ සමත්වුණා. ඔහුගේ හිතේ මැවුණු චරිතයට ජෝ සාධාරණයක් කළා.

ඊට පස්සේ තමන් රිදී තිරයට පිවිසුණු මුල් කාලයේ වගේ නැවතත් හාස්‍යෝත්පාදක චරිතයකට දායක වෙන්න ජෝ අබේවික්‍රමයන්ට හැකිවුණේ සකිසඳ එළියස් නාට්‍යයේ ආරච්චි මහත්තයා විදිහට. ඒ නාට්‍යයට ප්‍රේක්ෂකයන් කොච්චර ඇඳිලා ගියාද කියනවා නම් ඒ ජනප්‍රියත්වය නිසාම ජෝ මහත්තයාගේ අදහසකින් සබඳ පබිලිස් නමින් තවත් නාට්‍යයක් නිෂ්පාදනය වුණා. ඒ නාට්‍යයටත් කෝරළේ මහත්තයා විදිහට සුළු චරිතයකින් දායක වෙන්න ජෝ මහත්තයා කටයුතු කළා.

සබඳ පබිලිස් නාට්‍යයේ කොටසක්

මෑත කාලීනව ජෝ මහත්තයා එහෙමම සිනමාවේ හෝ ටෙලි නාට්‍යවල දැකගන්න බැරිවුණත් DFCC බැංකුව වෙනුවෙන් කළ වෙළෙඳ දැන්වීමෙන් දෙක තුළිනුත් ඔහු සතු අසහාය රංග ප්‍රතිභාව ඉස්මතු වුණා.

ඔයාලටත් මතක ඇති DFCC බැංකුවේ මුදල් තැන්පත් කරන්න එන වැඩිහිටි ගැමියාගේ චරිතයත් ඒ වගේම බැංකුවේ ණයකින් අලුත් ලොරියක් ගෙන්න ගිය තමන්ගේ පුතා එනකම් මුණුබුරාත් එක්ක බලන් ඉන්න සීයගේ චරිතයත් ජෝ අබේවික්‍රමයන් කළා.

කොහොම නමුත් ජෝ මහත්තයා රඟපෑව "දෑස නිසා" චිත්‍රපටියෙනුත් විශිෂ්ඨ රංගනයක් ඉදිරිපත් කළා කියලා ඒක බලපු අය නම් කියනවා.

දෑස නිසා චිත්‍රපටියෙන් කොටසක්

මම නම් ඒක බලලා නැති නිසා කියන්න අමාරුයි. කොහොම නමුත් හාස්‍යෝත්පාදක චරිතයේ ඉදලා අතිශය භාවාත්මක චරිතය දක්වාම තමන්ගේ රංග ප්‍රතිභාව අරන් ගිය ඒ ශ්‍රේෂ්ඨ රංගධරයා අපෙන් සමු අරන් ඉවරයි. සිනමා විචාරයක් නොවුණත් ජෝ අබේවික්‍රමයන් ගැන හිතට ආපු අදහස් ටිකක් තමා මේ පෙළ ගැස්සුවේ.......

යෝධයන්ගේ පරපුර ඉවරවේගෙන දෝ යන්නේ කියලා මට මේ මෑතක ඉදන් හිතෙන්න අරන් තියෙන්නේ.............

කොහොම නමුත් ජෝ මහත්තයා ඔබට සුභ රාත්‍රියක්!!!


ප.ලි.: මට පොඩි කරුණු දෙක තුනක් මග ඇරිලා තියෙනවා. 2001 වගේ ආපු "අස්වැසුම" චිත්‍රපටියටත් ජෝ අබේවික්‍රමයන් රංගනයෙන් දායකවෙලා තියෙනවා.

ඒ වගේම 2009 දී මාත් බැලුව "අලිමංකඩ" චිත්‍රපටියෙත් ජෝ මහත්තයා හිටියා. ඒත් අලිමංකඩ චිත්‍රපටියේ නම් විනාඩි 3 ක් විතර වගේ කොටසකට පෙන්නන කඩේක මුදලාලි කෙනෙක්ට තමා එතුමා රංගනයෙන් දායක වුණේ.......

මිහස පත්තරේ

අපේ Campus එකේ Peace and Conflict Resolution කරන කොල්ලෝ කෙල්ලෝ set එක මේ දවස් ටිකේ එක දිගට Gym Canteen එකට වෙලා බර කයියක්. මාත් එතනින් යන ගමන් නිකමට ඔළුව දාලා බලද්දී තමයි මේ වැඩේ ගැන දැනගත්තේ.

අපේ Peace set එක ලංකාවේ තියෙන තව Campus කීපෙකම ඉන්න කොල්ලෝ කෙල්ලෝ එක්ක එකතු වෙලා මිහස සංවිධානය හදාගෙන තියෙනවා. මිහස කියන්නේ කෙටියෙන්, දීර්ඝව කිව්වොත් මිනිස් හදවත් සනහමු. මෙන්න මේ අදහසත් එක්ක යන අපේ set එකගේ කතාව මෙන්න මෙහෙමයි.

".............අපි ලංකාවේ නිදහස් අධ්‍යාපනය නිසා campus ඇවිල්ලා ඉගෙන ගන්න කෙල්ලෝ කොල්ලෝ ටිකක්. අපේ කවුරුත් රෝස මල් යහනා උඩින් BMW වලින් කැම්පස් වැඩම කරපු අය නෑ..........

හරිම සාමාන්‍ය අම්මලාගේ තාත්තලාගේ එක එක විදිහේ දුක විඳලා අද එකම තැනකට ඇවිල්ලා ඉන්නේ. මේ පොඩි ජීවිත කාලෙදී එකිනෙකා ගත කරපු ජීවිත එක එක විදිහයි. හැමෝම ජීවත් වෙන්න ඔයා වගේම හොඳ කට්ටක් කාපු අය.

ලංකාවේ අද දවසේ උපාධිකාරයන්ට ඇත්තටම ප්‍රශ්නයක් තියෙනවා. හොඳට හෝ නරකට හරි ඒකේ අපිත් කොටස්කාරයෝ වෙලා. මේ ජීවිතේ හීනවලින් පුරෝගෙන... පුංචි කාලේ ඉදලාම එහෙමයි. කොච්චරක් නම් හීන හිතේ තියාගෙනද මේ පාරක් පාරක් ගානේ බස් එකක් බස් එකක් ගානේ කඩයක් කඩයක් ගානේ ජීවිතේ දිගේ අපි ඇවිදින්නේ.

ඒ හීන එකින් එක හැබෑවෙන්නත් කලින් එකින් එක දුරස් වෙනකොට ඇස් දෙකට කදුළු පුරෝගෙන අපි අපිම ගැන දුක් වෙනවා ඇරෙන්න වෙන කරන්න දෙයක් නෑ කියලා දෙන දෙයක් කාලා වෙන දෙයක් වෙන්න ඔහේ බලාගෙන ඉන්න ඔයාටත් හිතුණද ?

මෙන්න මේ වගේ ප්‍රස්තුතයක් එක්ක තමා මිහස ගොඩනැගෙන්නේ.........

ඉපදිච්ච එකේ ණය මේ මහ පොළවට ගෙවන්න සූදානම් අපේ යෞවනය වෙනුවෙන් කැප වෙන්න මිහස සූදානම්....

දැනුම් සමාජයට නව නිර්මාණශීලී පරිකල්පනය තියෙන අලුතින් හිතන අලුතින් හැදෙන යෞවන පරම්පරාවක් තමා මේ. පරක්කු වෙන්න වෙලාවක් නැහැ. කාලය වේගයෙන් ගෙවෙනවා. හැම තත්පරයක්ම අපට වටිනවා.

මිනිසත්කම, ආදරය දෝතින් අරගෙන මිනිස් හදවත් සනසමු කියන පැතුමත් එක්ක මිහස කටයුතු කරනවා. අප මිනිසුන් තැනිය යුත්තේ අප සමඟ යාමට නොව අප පසු කර යාමටය අපි දන්නේ එහෙමයි............."

මෙන්න මේ set එකේ අලුත්ම වැඩේ තමා මේ අදහස් සන්නිවේදනය කරන්න මිහස නමින්ම පුවත්පතක් නිකුත් කරන එක.

ජාත්‍යන්තර සාම දිනය යෙදෙන සැප්තැම්බර් 21 වෙනිදා කොළඹ 7 ජාතික පුස්තකාල ශ්‍රවණාගාරයේදී උදේ 8.30 මේ පුවත්පත හා හා පුරා කියලා නිකුත් කරන්න තමා මෙයාලගේ අදහස.

මෙදාට ප්‍රධාන දේශනය සිද්ධ කරන්නේ කොළඹ විශ්වවිද්‍යාලයේ සත්ව විද්‍යා අධ්‍යනාංශයේ අංශාධිපති මහාචාර්ය සරත් කොටගම මහතා.

ඒ වගේම කැලණිය විශ්වවිද්‍යාලයේ දර්ශන අධ්‍යනාංශයේ අංශාධිපති මහාචාර්ය දයා එදිරිසිංහ මහතාත් කොළඹ විශ්ව විද්‍යාලයේ ජාත්‍යන්තර සබඳතා අධ්‍යනාංශයේ අංශාධිපතිනි මහාචාර්ය නයනි මැලගොඩ මහත්මියත් කැලණිය විශ්වවිද්‍යාලයේ දර්ශන අධ්‍යනාංශයේ කථිකාචාර්ය ඉන්දික පෙරේරා මහතාත් මේකෙදී දේශන පවත්වන්න නියමිතයි.

අලුත් විදිහට හිතන රටේ අනාගතය බාරගන්න ඉන්න කොල්ලෝ කෙල්ලෝ කරන වැඩකට අත හිත සවිය දෙන්න කැමති හැමෝටම සාදරයෙන් ආදරයෙන් ආරාධනා කරනවා සැප්තැම්බර් 21 වෙනිදා උදේ 8.30 කොළඹ 7 ජාතික පුස්තකාල ශ්‍රවණාගාරයට එන්න කියලා.

ඔයාලට එන්න කියන්නේ Hall එක පුරවන්න, පුටු පුරවන්න නෙමෙයි. ඔබේ පැමිණීම ඇත්තටම වැදගත් නිසාමයි…………..


මිහස වෙබ් අඩවියට http://mihasayouthforpeace.org/

සඟ රස බස් - 3

සඟ රස බස් කියලා මම කතා දෙකක් ලිව්වා කාලෙකට ඉස්සර. ඒවා ඉතින් උපුටා ගත්තු කතානේ. අද කියන්න යන්නේ මමම අහපු සඟ රස බස් කීපයක්.

මම කාලයක් කඩවත පැත්තේ තිබුණු ඉංග්‍රීසි පංතියකට ගියා. ඒකේ හාමුදුරුවරු දෙනමකුත් හිටියා. Class එක පටන් ගත්තු මුලම දවස්වල වගේ interval එකකදී ආගිය තොරතුරු කතා කර කර ඉද්දී හාමුදුවරුන්ගේ නිකාය මොකක්ද කියන ප්‍රශ්නේ ආවා.

එක හාමුදුරු නමක් කිව්වා තමන් අමරපුර නිකායේ බව.

අනිත් හාමුදුරුවෝ හිනා වෙවී කිව්වා තමන් ඛුද්දක නිකායේ කියලා.

ඒක කියපු විදිහට අපි කීප දෙනාටත් හිනාගියා.

අනිත් හාමුදුරුවෝ ඇහුවා "මොකක්ද හාමුදුරුවනේ ඒ නිකාය. ලංකාවේ තියෙන්නේ අමරපුර, සියම්, රාමඤ්ඤ කියන නිකාය තුන විතරනේ" කියලා.

පස්සේ ඛුද්දක නිකායේ හාමුදුරුවෝ තමන්ගේ නිකාය ගැන විස්තරේ කළේ මෙන්න මෙහෙමයි."පළවෙනි ධර්ම සංගායනාවෙන් පස්සේ බුද්ධ ධර්මේ නිකාය 4 කට බෙදුවනේ දීඝ නිකාය, අංගුත්තර නිකාය, සංයුක්ත නිකාය, මජ්ඣිම නිකාය කියලා. ඒවාට දාන්න බැරි ඉතුරු වුණු ජාතක කතා පාලිය, ධම්මපදේ, ථේර ථේරී අපදානේ වගේ ඒවා දැම්මේ ඛුද්දක නිකායටනේ.

ඒ වගේ මම ඉන්න පන්සලෙත් හැම නිකායේම වගේ හාමුදුරුවරු ඉන්නවා. ඒ නිසා අපි එකතු වෙලා අළුත් නිකායක් හදාගත්තා ඛුද්දක නිකාය කියලා :))

-----------------------------------------------------------------------------------------------

මෙන්න අනිත් කතාව. අපේ පන්සලේ දාන ශාලාවේ ඔරලෝසුව දැන් කාලයක් තිස්සේ ඉදන් වැඩ කරන්නේ නැහැ. කවුරුත් බැටරියක් දාන පාටකුත් නැහැ.

මම දවසක් ඕක පොඩි හාමුදුරුවන්ගෙන් අහපුවාම පොඩි හාමුදුරුවෝ කියනවා "හසිත අයියා දැක්කද ඔරලෝසුව නතර වෙලා තියෙන්නේ කීයටද කියලා මම බලලා කිව්වා 11.25 ට.

එතකොට හසිත අයියේ ඕන වෙලාවක අපිට දාන ශාලාවට ඇවිත් දානේ ගන්න පුලුවන්නේ. 11.30 කලින්නේ දානේ ගන්න ඕනේ. එතකොට කැපයි. අපි විද්‍යානුකූලව හිතලයි එහෙම කරලා තියෙන්නේ " කියලා

-------------------------------------------------------------------------------------------------

අපේ දහම් පාසලේ පහුගිය අවුරුද්දේ තිබුණු ත්‍යාග ප්‍රදානෝත්සවේ කතාවක් මම මීට කලිනුත් කිව්වා මතක ඇතිනේ. ඉතින් මේකත් ඒ උත්සවේදීම සිදුවුණු සිද්ධියක්.

උත්සවේ ආරම්භ වෙන්න කලින් ධජ එසවීමක් තිබුණා. ඒකෙදී ජාතික කොඩිය ඔසවන්න අපේ ප්‍රාදේශීය ශාසනාරක්ෂක බල මණ්ඩලයේ සභාපති හාමුදුරුවන්ටත් බෞද්ධ කොඩිය ඔසවන්න ලේඛකාධිකාරී හාමුදුරුවන්ටත් භාරවෙලා තිබුණේ.

ඉතින් සම්භාවනීය අමුත්තෝ ඔක්කොම වට කරගෙන ඉද්දී සභාපති හාමුදුරුවොයි, ලේකම් හාමුදුරුවොයි ධජ ඔසවන්න පටන් ගත්තා. සභාපති හාමුදුරුවෝ ජාතික කොඩිය ඔසවලා ලණුව කොඩි ගහේ ගැටගහන්න ගත්තා විතරයි කොඩිය කඩාගෙන බිමට වැටුණා.

හාමුදුරුවෝ හයියෙන් ඇද්ද නිසා නම් නෙමෙයි ඕක වුණේ. මම හිතන විදිහට අපේ දහම් පාසලේ අප්පුහාමිලා ගහපු බුලක් නිසා තමයි ඕක වුණේ :)

කොහොම හරි ලේකම් හාමුදුරුවෝ පරිස්සමට බෞද්ධ කොඩිය එසෙව්වා. අන්තිමට ජාතික කොඩිය නැතත් ජාතික ගීය ගායනා කරලා අමුත්තෝ උත්සව ශාලාවට පිටත් වුණා. නායක හාමුදුරුවරු උත්සව ශාලාවට වඩින ගමන් ලේකම් හාමුදුරුවෝ ඔක්කෝටම ඇහෙන්න හයියෙන් කිව්වා.


"අපේ සභාපති හාමුදුරුවොත් වාරියපොළ සුමංගල හාමුදුරුවෝ වගේනේ. සුමංගල හාමුදුරුවෝ ඉංග්‍රීසි කොඩිය කඩලා ගත්තා වගේ සභාපති හාමුදුරුවොත් සිංහ කොඩිය හයියෙන් ඇදලා කඩලම දැම්මා නේද ?" :))

------------------------------------------------------------------------------------------------

සම්බුද්ධත්ව ජයන්තිය තිබුණනේ. හැම පන්සලේම හරි හරියට පින්කම් කළානේ. අපේ පන්සලෙත් සතියෙම පින්කම් තිබුණා.

නායක හාමුදුරුවන්ටත් බරටම වැඩ. වෙසක් පෝය දවසේ උදේ ඉදන් පන්සලේ වැඩ බලන ගමන් ධර්ම දේශනා කීපයකටත් වඩින්න වුණා. හවස භක්ති ගීතයක් තිබුණා.

ඒකෙත් වැඩ බලන්න ආපු ගමන් නායක හාමුදුරුවෝ හොඳටම මහන්සි පිට මට කියනවා "බලනවා හසිත මේ දවස් ටිකේම එක දිගටම පින්කම්, බණ, පිරිත්. හරියට නිදාගන්නවත් වුණේ නැහැනේ. අනේ ඇත්තටම සිදුහත් බෝසතාණන් වහන්සෙත් බුදු වුණානේ" කියලා

------------------------------------------------------------------------------------------------

මේ කතා දෙක නම් කට්ටිය දන්නවත් ඇති. දවසක් හවස පන්සල් ආපු උපාසක අම්මා කෙනෙක් පොඩි හාමුදුරුවෝ ගැන චෝදනාවක් නායක හාමුදුරුවන්ට කරන්න ගත්තා.


"බලන්න නායක හාමුදුරුවනේ පොඩි හාමුදුරුවෝ පේර ගහට වඩිනවා, පොකුණට වඩිනවා. එහෙම හොඳද මම අහන්නේ" කියලා.

ටියුබ් ලයිට් කට්ටියට කියන්නේ පොඩි හාමුදුරුවෝ පේර ගහට නැගලා පොකුණට පනිනවා කියන එක තමා උපාසක අම්මා අර විදිහට කිව්වේ. හාමුදුරුවෝ සම්බන්ධ කටයුතුවලදී භාවිතා කරන්නේ වඩිනවා කියන වචනේ නිසයි මෙහෙම වුණේ :))

------------------------------------------------------------------------------------------------

මේත් ඒ වගේම කතාවක්. අලුත මහණ වුණු පොඩි හාමුදුරුවෝ කතා කරද්දී හුඟාක් වෙලාවට කනවා, ආවා, ගියා වගේ වචන පාවිච්චි කරන නිසා නායක හාමුදුරුවෝ අවවාද කළා.

"පොඩි නම දැන් හාමුදුරු නමක් නිසා කතා කරන්න ඕනේ ගිහි කාලේ වගේ නෙමෙයි. කනවා කියන එකට කියන්න ඕනේ වළදනවා කියලා, ආවා ගියා වගේ ඒවාට පාවිච්චි කරන්නේ වඩිනවා කියන එක. තේරුණාද පොඩි නම" කියලා.

ඔය සිද්ධියෙන් දවස් දෙක තුනකට පස්සේ පොඩි හාමුදුරුවෝ පන්සලට හයියෙන් දුවගෙන [වැරදීමක්... හයියෙන් වැඩගෙන] එනවා.

නායක හාමුදුරුවෝ ඇහුවා "මොකෝ පොඩි නම ?" කියලා.

පොඩි හාමුදුරුවෝ මෙහෙම කියනවා "ලොකු හාමුදුරුවනේ, මම පන්සලට වඩිද්දී බල්ලෙක් වැඩියනේ [ආවා] මාව වළදන්න [කන්න]. මමත් ඉතින් හයියෙන් වැඩගෙන වැඩගෙන එද්දී බල්ලත් හයියෙන් වැඩගෙන [දුවගෙන] එනවා. කොහොම හරි මම හයියෙන් වැඩිය නිසා සිවුරත් පාරට වැඩියා [ගියා] " කියලා

ප.ලි.: මේ කතා අපහාසයක් පිණිස නොව හුදෙක් කතා පිණිසම ලියූවක් බව පහන් සිත් ඇත්තෝ වටහා ගනිත්වා...............

නිකම් කතා තුනක්

පෙරේදා ඒ කියන්නේ ඉරිදා අපේ Logic Class ආපු නංගි කෙනෙක් class එක ගැන යොවුන් නවකතා පොතක් ලියලා ඒකේ Book Launch එක තිබුණා. ඒකට අපි හැමෝටම invite කරලා තිබුණු නිසා අපි මිස්ලගේ ගෙදරට set වුණා.

එතකොට ලේසියිනේ. මිස් එක්කම car එකේ ගම්පහ Book Launch එක තිබුණු hall එකට යන්න පුලුවන්නේ :)

මිස් car එකෙන් තන්තිරිමලේ කුඹුරක් හාපු හැටි

ආහ් මිස්ගේ car එක කිව්වාම මතක් වුණේ ඒ car එක ගැන ඔයාලා දන්නවා. අර අර තන්තිරිමලේ ගිහින් කුඹුරක් හෑවේ අන්න ඒ car එකෙන් තමයි :))

ඉතින් Book Launch එකට යන එන අතර තුර අපි කීපදෙනායි මිස් සහ සර් අතර වුණු කතා තුනක් තමයි මේ.....

------------------------------------------------------------------------------------------------

කතා අංක 1


මම : මිස් දන්නවාද මට දැන් Phone එකට දෙරණ newa alert එකක් ආවා. ලංකාවේ මිනිස්සු 40 ක් හොරෙන් ඕස්ට්‍රේලියාවට පනින්න යද්දී Navy එකෙන් අල්ලගෙන......

මිස් :කොහොමද එවුන් ඕස්ට්‍රේලියාවට පනින්න ගිහින් තියෙන්නේ ?? උඩින්ද ???

මම : උඩින් යන එවුන්ව කොහොමද මිස් මුහුදේ ඉන්න Navy එකෙන් අල්ලන්නේ :)) ඔන්න මුහුදෙන් පනින එවුන්ව නම් අල්ලයි :))

----------------------------------------------------------------------------------------------

කතා අංක 2


Book Launch එකට එන්න කියලා අපිට call කරලා තමයි එන්න කිව්වේ. ඉතින් Invite කරන එක එක විදි ගැන කතාවක් ඇදිලා යද්දී තමා මේ කතාවට ආවේ.......

සර් : නුවර පැත්තේ නම් ආරාධනාවක් ලැබෙන්නේ නැතුව මොකක් හරි එකකට ගියාම කෙළින්ම මූණටම අහනවා "මොකද මේ පැත්තේ ආවේ උවමනාවකටද ?" කියලා

ගිහාන් : එහෙම අහද්දී ඉතින් වළක් කපාගෙන පනින්න තමයි හිතෙන්නේ නේද සර්

මම : හැබැයි ඉතින් අපිට මෙහෙමත් කියන්න පුලුවන් චාටර් වෙන්නේ නැතිවෙන්න. එහෙන් අහද්දී "මොකද මේ පැත්තේ ආවේ උවමනාවකටද ?" කියලා කියන්න තියෙන්නේ "නෑ මේ උදැල්ලක් ඉල්ල ගන්න ආවේ" කියලා.

එතකොට උනුත් බලනවානේ මූ මොකටද උදැල්ල ඉල්ලන්නේ කියලා. ඊට පස්සේ කියනවා "නෑ මේ පොඩි වළක් කපාගෙන ඒකට පනින්න" කියලා :))

----------------------------------------------------------------------------------------------

කතා අංක 3


Book Launch එක ඉවරවෙලා ආපහු ගෙදර යද්දී සර් එක පාරටම car එක නැවැත්තුවා. අපිත් එක පාරටම ගැස්සුණා මොකද සර් හදිසියේම කාර් එක නැවැත්තුවේ කියලා..........

සර් : බබා දැක්කද deepest sympathy බැනර් එක. අපි මේ මළ ගෙදරට පොඩ්ඩක් ගොඩවෙලා යමු

මිස් : පිස්සුද බබා ඔයා මේ මනුස්සයාව දන්නවාද ???

සර් : නෑ බබා මම මේ නිකමට කිව්වේ [ සිනා :)) ]

ගිහාන් : යමු යමු සර්. අපි ඇඳන් ඉන්නෙත් සුදු ෂර්ට්නේ. අද තමයි දවස

සර් : ඒක නෙමෙයි ඇත්තටම මම මළ ගෙදරකට වැරදිලා ගිහින් තියෙනවා. පස්සේ තමයි දැනගත්තේ මම යන්න ඕනේ මළ ගෙදරට තව ටිකක් දුර යන්න ඕනේ කියලා :))

------------------------------------------------------------------------------------------------

ප.ලි.: අපේ Logic Class එකේ තව හොඳ හොඳ කතා කියවන්න කැමති නම් යන්න Logic Class කතා

ප.ප.ලි.: ඉදිරියේදී පළවීමට නියමිත කතා ලැයිස්තුව මුහුණු පොතට එක් කළෙමි. හුදී පහන් ජන සංවේගයට මෙයටද එක් කරමි :))

1. සඟ රස බස් - 3
2. තෙසැත්තෑ බුද්ධ ඤාණ පූජා පිංකම
3. මහින්දාගමනයට මහා shot එකක්

Bindi අක්කා කිව්වා හරිය. ලිස්ට්වලට කතා ලිවීම අපහසුය :))

රස කැමැත්තෝ රස විඳිත්වා..........

වානගුරු සර්

Science Class එකේ ඉදන් Arts Class එකට නික්මන් කළාට පස්සේ Arts Sectional Head ෂ්‍යාමෙන් මිස් Arts Subjects categorize කරලා තිබුණු කොළයක් මට දීලා ඒ category තුනෙන් කැමති subjects 3 ක් තෝරගන්න කියලා කිව්වා.

මුල්ම category එකෙන් මම හුඟක් කැමති History ත් දෙවෙනි category එකෙන් කලු කපුටෝ සුදු කරන Logic ඒ වගේම අන්තිම category එකෙන් මටත් දේශපාලනේ කරන්න පොඩියට වගේ idea එකක් තියෙන නිසා Political Science ත් තෝරගත්තා.

Political Science එහෙමත් නැත්නම් දේශපාලන විද්‍යාව period එක වෙලාවට අනිත් periods එහෙම කට් කරන අපේ අයියලා ටිකත් ඔක්කොම වගෙ පංතියේ හිටියා. මට තේරුණා සර් නම් පොරක් බව. Period එක වෙලාවට කට්ට කලු හැබැයි පට්ට සුදු දත් ටිකක් තියෙන වානගුරු සර් පංතියට ආවා.

වානගුරු සර්

පාඩම් කියල දෙන විදිහත් සර්ගේ නියමයි. මගෙන් ප්‍රශ්න දෙක තුනක් අහලා මට ලියාගන්න බැරිවුණු notes එහෙමත් සම්පූර්ණ කරගන්න කියලා සර් කිව්වා. පංතියේ set එකෙන් දැනගන්න ලැබුනු විදිහට සර් NCC Captain කෙනෙක්. අලුතින් ඉස්කෝලෙට ඇවිත් තියෙන්නේ. ශිෂ්‍ය භටයන් භාරව ඉන්නෙත් සර්ම තමා.

ඉතින් A/L කරපු අවුරුදු දෙකේ රසවත් සිද්ධි බොහොමයි. කොල්ලෝ සර්ට දාලා තිබුණු කාඩ් එක තමයි ඩැඩී. මොකද සර්ගේ නමේ මුල් අකුරු තුන තමයි D.A.D . ඒ වගේම ආදරේට වගේ "වානේ" කියලා නම කෙටි කරලත් කිව්වා.

සර් හැමෝටම එකම හැන්දෙන් තමා බෙදුවේ. පංතියේ ඉන්න කොච්චර දක්ෂ ළමයෙක් වුණත් වැරැද්දක් කළොත් දඬුවම් දෙන එක සර් කළා. මට ඒක හොඳටම මතක පංතියේ Political Science වලට හෙණම මීටරෙන් හිටිය ඕෂධිටත් මොකක් හරි සීන් එකකට දඬුවම විදිහට ඩෙස්ක් එක යටට රිංගන්න කියපු එක.

පංතියේ සර්ත් එක්ක කිසි ගේමක් නැතුව හොඳට ඉන්න නම් කරන්න තිබුණේ එකම එක දෙයක් "සර් පාඩම ඉගැන්වුවාම හොඳට ප්‍රශ්න අහන්න ඕනේ" ඒ method එක දැනගෙන හිටිය අපි කීප දෙනෙක්ම සර් එක්ක හොඳට හිටිය කිසි අවුලක් නැතුව.

එක පාරක් term test එකේ political science paper එක වෙලාවේ සර් පංතියේ ඉද්දිම මම මගේ එහා පැත්තේ හිටිය එකාට MCQ උත්තර ටික පෙන්නුවා.

පහුවෙනිදා උදේම සර් ඇවිත් අපි දෙන්නට කතා කරලා කියනවා "හසිතගෙත් MCQ paper එකේ 38 ක් හරි, අකලංකගෙත් MCQ 38 ක් හරි. හසිතගේ 14, 25 ප්‍රශ්න වැරදියි, අකලංකගෙත් ඒ ප්‍රශ්නම වැරදියි. මෙතන වුණේ මොකක්ද කියලා මම අනිවාර්යයෙන් හොයලා බලනවා" කියලා.

පස්සේ ඉතින් ඇත්තටම වුණු සිද්ධිය අකලංක සර්ට කිව්වා. පස්සේ සර් කියනවා "මට කේන්ති උඹලා දෙන්නා කොපි කරපු එකට නෙමෙයි. මෙතන මම පංතියේ ඉද්දිම උඹලා දෙන්නා මගේ කනෙන් රිංගලා මේ වැඩේ කරපු එකට" කියලා :))

කොහොම හරි අන්තිම දවස්වල අපි ඉස්කෝලේ යන්නෙත් නැහැනේ. සර් ගෙදරත් අපේ ළමයින්ව තියාගෙන ඉගැන්නුවා. මට නම් ඒවාට යන්න වුණේ නැහැ. මොකද මම කියලත් ඇති අපේ Logic මිස්ගේ නේවාසික පාඨමාලාවත් මට සෙට්වෙලා තිබුණනේ.

අපේ අන්තිම parents meeting එකේදී සර් අපේ තාත්තත් එක්ක මට පලු යන්න බැන්නා මම ඒ classes වලට ආවේ නැහැ කියලා. කොහොම හරි A/L Political Paper එක ලියලා ඉවරවෙලත් මම මුලින්ම සර්ට කතා කරලා paper එක ගැන විස්තරේ කිව්වා.

සර් ගැන මට තියෙන සොඳුරුම මතකය ගැන තමයි මේ කියන්න යන්නේ. මට උගන්වපු හැම ගුරුවරයෙක්ටම මම පොඩි තෑග්ගක් දුන්නා. තෑග්ග තමයි E.R. බ්‍රේත්වෙට් ලියපු To Sir with Love පොතෙන් මුදිත ගුණතිලක සිංහලයට පරිවර්තනය කරපු "ගුරු තරුව ඔබයි" පොත. මේ පොත ගැන මම මීට ඉස්සෙල්ලත් කියලා තියෙනවා. කැමති නම් කියවලා බලන්න.

To Sir with Love පොතෙන් තැනුණු චිත්‍රපටිය

ඒ වගේම මම පොතේ මුල් පිටුවේ පොඩි නිසඳැසකුත් ලියලා තිබුණේ.

පිපෙන්නට ළං වූ
මල් කැකුළකට
උපකාරයක් වූ
හිරු කිරණක් මෙන්
ජීවිතයේ බාධක මැද
අභියෝග මැද
ජයග්‍රහණය කර යන්නට
ඔබෙන් ලද මඟ පෙන්වීමට
ඔබට පිදෙන ප්‍රණාමයි
දයාබර ගුරු පියාණෙනි

ඒ දවස්වල ඒ කියන්නේ After A/L කාලේ අපි Senior Prefectsලා විදිහට ඉස්කෝලේ ඉන්න කාලේ. පොත දීලා දවස් දෙක තුනකට පස්සේ මට වානගුරු සර්ව හම්බුණා.

සර් කිව්වා "හසිත මෙච්චර කාලෙකට මගේ ගෝලයෙක්ගෙන් මට හම්බුණු අමතක නොවෙන තෑග්ගක් තමයි ඒ පොත. මම ඒක එක හුස්මට කියෙව්වා. ඇත්තටම වටින කියන පොතක්. මම ඒක Principalටත් ගිහින් දුන්නා කියවන්න. මගේ ගෝලයක් මට දීපු තෑග්ගක් කියලා"

පස්සේ A/L Results ඇවිත් මට Law Faculty යන්න පුලුවන්කම තියෙද්දිත් කැලණි Campus එකේ History කරන්න යන්න හදන එක ගැන සර් හුඟාක් දුක් වුණා වගේම දවසක් සර් පංතියක උගන්වන වෙලාවක මට එන්න කියලා පංතියේ ළමයින්ටත් මගේ කතාව කියලා මාව හුඟාක් වර්ණනා කළා.

අර කලින් කතාවේ ඉතුරු ටික වගේම හොඳම ටික තමයි මේ.

දවසක් ඕෂධී [අර ඩෙස්ක් එක යට රිංගලා හිටිය පොර] කතා කරලා කිව්වා. වානගුරු සර්ව දෙහිවල දෙහිවල මධ්‍ය මහා විද්‍යාලයට transfer කරලා. සර් තමයි දැන් ඒ ඉස්කෝලේ අලුත් Principal කියලා.

මම සර්ට wish කරන්න call එක ගත්තාම සර් කිව්වා "මම හසිතට කතා කරන්න හිටියේ. අලුත් ඉස්කෝලෙට ගිහින් තමා දවස් තුනයි. ඉස්කෝලට ගිය මුල්ම දවසේ මම Staff meeting එකක් ගත්තා.

ඒකෙදී ඔයා මට දීපු පොත පෙන්නලා, ඒ පොත මට දීපු ගෝලයා ගැනත් කියලා හැම ගුරුවරයෙක්ටම ඒ පොත අනිවාර්යයෙන්ම හොයාගෙන කියවන්න කියලා මම කිව්වා" කියලා......

ගෝලයෙක් විදිහට මට ඇත්තටම ඒ කතාව අහපුවාම හරිම සතුටුයි :)

ඉතින් තව තවත් දැයේ දරුවන්ගේ අනාගතය යහපත් කරන්න සර්ට හැකිවෙන්න කියලා හදවතින්ම මම ප්‍රාර්ථනා කරනවා

සර් අලුත් ඉස්කෝලේ කරන වැඩ ගැන මේ එකෙන් දැනගන්න පුලුවන්

http://www.dehiwalacentral.edu.lk/

ප.ලි.: හදිසියේම මේ කතාව කියන්න මතක් වුණේ මගේ අම්මත් ගුරුවරියක්. අම්මලාගේ ඉස්කෝලේ ළමයි ගිය අවුරුද්දක් ලෝක ගුරු දිනය වෙනුවෙන් අම්මලාටත් දීලා තිබුණේ ඒ පොත. ඒක මේ ළඟදී කියෙව්වා. ඒකත් එක්කම ඒ පොතත් එක්ක බැඳුණු මගේ සුන්දර මතකයත් සිහිය ආවා.................

ප.ප.ලි.: ලියන්නම් කියලා කිව්ව කතා list එකෙන් පිට කතාවක් තමයි මේක. මහින්දාගමනය film එක ගැන post එක ලියලා ඉවරයී. ඒකේ තියෙන අඩුපාඩු ටික හරියටම නිවැරදි කරගත්තාට පස්සේ ඒක publish කරන්නම්.

තෙසැත්තෑ බුද්ධ ඤාණ පූජා පිංකම ගැන විස්තර ඔක්කොම හොයාගෙන තියෙන්නේ. post එක ලියන්න විතරයි ඉතුරු වෙලා තියෙන්නේ. ඒ ඔක්කෝම comming soon :))

මුට මොකද වුනේ කියලා කීප දෙනෙක් හොයලත් තිබ්බා. ඒ හැමෝටමත් පින් :)

ගමට දිවියෙක් ඇවිත්

සි‍යඹලාපේ ඒ කියන්නේ අපේ ගමේ මිනිස්සුන්ව ත්‍රාසයෙන් භීතියෙන් මුසපත් කරපු සිද්ධියක් ගැනයි ඔයාලට කියන්න යන්නේ......

එදා වෙනදා වගේම හොඳට ඉර පායපු දවසක්. එදා උදේම මට පන්සලට යන්න වුණා දහම් පාසලේ වැඩ වගයක් ගැන පොඩි හාමුදුරුවොත් එක්ක කතා කරන්න. පොඩි හාමුදුරුවොයි මායි කතා කර කර ඉද්දී තමයි නායක හාමුදුරුවෝ මට කතා කලේ. ඒ වෙලේ ආවාසේ ගාව මිදුලේ පොලිස් ජීප් එකත් නවත්තලා මීගහවත්ත පොලීසියේ රාළහාමිලා දෙන්නෙකුත් හිටියා.

මොකක්ද හුටපටේ කියලා හිතන්න කලින්ම නායක හාමුදුරුවෝ කිව්වා

"හසිත, ගෝල්ඩන් එකේ පිට්ටනිය ඉස්සරහ පාරේ කට්ටිය දිවියෙක්ව අල්ලගෙන ඉන්නවා. මේ පොලීසියේ රාළහාමිලාට එතනට යන්න පාර පෙන්නන්න" කියලා.

නයි කයිද රෝස් පාන් කිව්වලු. දිවියෙක් ???? අපේ ගමේ. ලංකාවට තිබුණු කොටි ප්‍රශ්නේ ඉවර වුණු ගමන් සියඹලාපෙට දිවි ප්‍රශ්නේ.......

"හරි එහෙම නම් රාළහාමිලා මගේ පිටිපස්සෙන් එන්න" කියලා මම ආපු මෝටර් බයික් එකට මම නැග්ගා.

පොලිස් ජීප් එක මගේ බයික් එක පිටිපස්සෙන් එනවා. මාත් බයික් එකේ උත්සවවල පෙර ගමන් යන බයික් එකක් වගේ ඉස්සරහින් යනවා.

මට කියන්න අමතකත් වුණා. ඒ වෙලේ මම හෙල්මට් දාලත් නෙමෙයි හිටියේ. කොහොමද ඒක :))

හොඳම කතාව මම කලින් දවසකත් කිව්වා වගේ "මට ලයිෂනුත් නැහැ, බයික් එකට ල‍යිෂනුත් නැහැ" කොහොම වුණත් ගමට දිවියෙක් ආවා කියපුවාම ඕවා වැඩක් තියෙනවාද.

ජාතික අවශ්‍යතාව වෙනුවෙන් සමාවෙන්න ග්‍රාමීය අවශ්‍යතාව වෙනුවෙන් අපි කැපවෙන්න ඕනේ නේ :)

හාමුදුරුවෝ කිව්ව පිට්ටනිය ඉස්සරහ පාර ගාවට යද්දී පාර දෙපැත්තේ සෙනඟ සූ ගාන්න. පාර දිගේ ඉස්සරහට යන්නත් බැහැ. ඒ තරමට සෙනඟ දිවියා බලන්න ඇවිත්. පොලිස් ජිප් එකත් එක්ක ආපු නිසා මාත් ගියා ඉස්සරහටම.

ගිහින් බැලුවාම හිටිය දිවියා මෙන්න................

අනේ අනිච්චං උදේ පාන්දරම දෙන ගොන් ආතල් කියලා මට හිතුණා. ත්‍රාසය භීතිය දනවන සියඹලාපේට ආපු දිවියා තමා මූ.

බළලෙක්ට වඩා ලොකු, බල්ලෙක් සයිස් මුට කියන්නේ හඳුන් දිවියා කියලාලු. මම හිතුවේ සිරාවටටම පෙරිය සයිස් දිවියෙක් කියලා. මෙන්න මේ වගේ

මේ සතා රෑ ඒ ළඟ කෙනෙකුගේ ගෙදර මිදුලේ කපලා තිබුණු වළකට වැටිලා ඉදලා තමයි හොයාගෙන තියෙන්නේ. මේ සතාගෙන් එච්චර හානියක් නැහැ කැලේ කිට්ටුවට අරන් ගිහින් අතාරින්න කියලා පොලිසියේ රාළහාමිලා කියලා එයාලා යන්න ගියා.

මාත් ගෙදර ගිහින් ඉක්මණට කැමරාව අරන් ආවා photos දෙක තුනක් ගන්න. ගමේ මිනිස්සු ටික මේ සතාට දුන්නු වදයක්. කකුල් හතරම බැඳලා, කටත් බැඳලා තිබ්බේ හරියට හෙණ කොටියෙක් අල්ලලා වගේ.


ඒ අස්සේ ගොන් ජොකියෙක් මුගේ වලිගේ අල්ල අල්ල කියනවා "කොටි වලිගේ ඇල්ලුවා කියලා කියමනක් තියෙන්නේ. ඔන්න මම කොටි වලිගෙකුත් ඇල්ලුවා" කියලා.

තව සමහරුන්ට සිහිය ස්වර්ණවාහිනියට කියන්න අටපට්ටමට කියන්න. කියලා ටීවී එකට මූනත් තහඩුව දාගන්න. තව සමහරුන්ගේ කතාව දෙහිවල සත්තු වත්තට ගිහින් මූව බාරදෙන්න.

එතන ඉන්න කාටවත් පොලිසියෙන් කිව්වා වගේ සතා අතාරින්න උවමනාවක් නැහැ. එතන හිටිය පණ්ඩිතයොත් එක්ක ඕවා කතා කරන්න මම ගියේ නැහැ. මම ගෙදර එන්න ආවා.

අපේ උන්දැලා ටික ඒ සතාට මොකක් කළාද මන්දා...... සතා මළාද දන්නෙත් නැහැ අපේ අයියලා සතාට දුන්නු වදවල හැටියට. ඒ සතා ගැහැණු සතෙක් කියලත් පේන්න තිබුණා. පැටව් එහෙමත් ඉන්නවාද දන්නේ නැහැ.

මේ වගේ සත්තු හම්බුණාම ගොන් පාට් නොදා කරන්න ඕනේ දේ ගැන මිනිස්සුන්ගේ දැනුවත් බවේ තියෙන අඩුව නිසා නිරපරාදේ සත්තු මැරෙනවා.

සත්තු වත්තට ගිහින් දෙන එක ඒ වෙලේ කිව්වාම කෙනෙක් කිව්වේ "එයාලගේ වත්තෙන් නයෙක් අල්ලලා ඌව සත්තු වත්තට ගිහින් දුන්නට සතයක්වත් හම්බුණේ නැහැ. ඒ වැඩෙන් වාහනේ ඩීසල් ටිකයි වෙලාවයි තමා නාස්ති වුණේ" කියලා.

මේ ගැන නිසි අවබෝධයක් දෙනවා නම් සතුන්ගේ ජීවිතත් පරිස්සම් වෙයි.

වැඩිදුර හඳුන් දිවියෝ ගැන කියවන්න ඕනේ නම් පත්තරේක ගිය හඳුන් දිවියෙක් ගැන කතාවක් මෙන්න

ප.ලි.: දිවියෝ ඇල්ලුවා කියලා පොඩි සයිස් හඳුන් දිවියෝ අල්ලන එක වගේ නෙමෙයි. මේ නම් රියල් වැඩක්.

කඩුවෙල බෝමිරියේ ඉන්න අපේ බාප්පා කෙනෙක්ගේ වත්තේ ඉදලා අහුවුනු රියල්ම රියල් තිත් පොළඟෙක් තමා මේ. සාමාන්‍යයෙන් තිත් පොළඟාගේ දිග අඩි 4 ක් විතරලු වෙන්නේ. මූ අඩි 6 ක් විතර දිගයි.

ලෝකේ විසකුරු සර්පයන්ගෙන් 7 වෙනියට තමා මූ ඉන්නේ. කොහොමද මේක ????

වැඩිදුර කියවන්න තිත් පොළඟා ගැන අපේ බ්ලොග් සහෘදයෙක් වෙන ප්‍රියන්ත අයියා ලියපු ලිපියක්

දැන් ඉතින්.......

කලින් කිව්වා වගේ තියෙන ප්‍රශ්න විසඳන්නත් අලුත් ප්‍රශ්න ඇතිකර නොගන්නත් උත්සහ ගන්නවා කීයලා කිව්වාට ඒකත් ලේසු පහසු වැඩක් නෙමෙයි. ඒ කොහොම වුණත් කලින් හිටිය මොකක් හරි තත්වෙකින් ක්‍රම ක්‍රමයෙන් මිදිලා දැන් ටික ටික සුපුරුදු තත්වයට එන්නයි හදන්නේ.

මෙච්චර දවසක් මේ මනුස්සයාට මොකද වුණේ කියලා හරි හොයලා බලපු, හොයලා බලන්නේ නැතුව පාඩුවේ හිටපු හැමෝටම ස්තුතියි :)

විශේෂ ස්තුතියක් අපේ මාරයා එහෙමත් නැත්නම් චතුෂ කුමාර සහෝදරයාට

මේ දවස්වල බරටම වැඩ තිබුණත් "Back to business" කියලා වැඩ පටන් ගන්න ඉන්නේ.

මෙන්න Comming soon කතා සැට් එක

• මේ දවස්වල හුටපට
  [හුටපට වුණත් ගත යුතු යමක් ඇතැයි සිතමි]
• තෙසැත්තෑ ඤාණ පූජා පිංකම [හරි අක්කාගේ ඉල්ලීමකට බොහෝ දෙනාගේ හිතසුව පිණිස, දැක සතුටු වීමට ලියන එකක්]
  
• මහින්දාගමනයට මහා shot එකක් [නිධාන කතාවක් එක්ක දෙන හොඳ [මම හිතන විදිහට] shot එකක්]
  
• ගමට දිවියෙක් ඇවිත් [සියඹලාපේ ග්‍රාමය භීතියෙන් මුසපත් කළ ඒ ලොමු දැහැ ගැන්වෙන දිවියාගේ අන්දරය]